कपिलवस्तु:
राष्ट्रिय स्वतन्त्र पार्टी (रास्वपा) का सभापति एवं पूर्व गृहमन्त्री रवि लामिछाने भोलि (शनिबार) कपिलवस्तु आउँदै हुनुहुन्छ। पार्टीको देशव्यापी अभियान ‘घन्टी अभिवादन’ मार्फत नागरिकसँग जोडिने उद्देश्यले उहाँको यो भ्रमण हुन लागेको हो। सभापति लामिछानेको आगमनले जिल्लाका रास्वपा कार्यकर्ता र शुभचिन्तकहरूमा नयाँ उत्साह सञ्चार गरेको छ, तर आम सर्वसाधारणमा भने एउटै जिज्ञासा छ– के यो तामझामपूर्ण भेटघाटमा स्थानीयका वास्तविक मुद्दा र समस्याले प्राथमिकता पाउलान् कि ओझेलमा पर्लान्?
पार्टी स्रोतका अनुसार सभापति लामिछानेले जिल्लाका तीनवटै निर्वाचन क्षेत्रलाई समेट्ने गरी यात्रा तय गर्नुभएको छ। उहाँले जितपुर, गोरुसिङ्गे, चन्द्रौटा, बहादुरगंज र महाराजगंज जस्ता प्रमुख व्यापारिक तथा राजनीतिक केन्द्रहरूमा पुगेर नागरिकसँग संवाद गर्ने कार्यक्रम छ। पार्टीका नेता बालकृष्ण पाण्डेका अनुसार यो भ्रमण केवल औपचारिकतामा सीमित नभई स्थानीय स्तरमा पार्टीको उपस्थितिलाई मजबुत पार्न र जनतासँग प्रत्यक्ष जोडिन केन्द्रित हुनेछ।
लामिछानेको भ्रमणलाई सफल बनाउन स्थानीय कार्यकर्ताहरूले तयारी तीव्र पारेका छन्। जिल्लाका विभिन्न स्थानमा स्वागतद्वार निर्माण गर्नेदेखि स्वयंसेवक परिचालन र सुरक्षा व्यवस्थापनसम्मका कामहरू सकिएका छन्। स्थानीय प्रशासनसँगको समन्वयमा कार्यक्रमलाई व्यवस्थित बनाइएको छ। रास्वपाको बढ्दो राजनीतिक सक्रियताले गर्दा यो भ्रमणलाई राष्ट्रिय राजनीतिमा पनि चासोका साथ हेरिएको छ।
नेता पाण्डेले दाबी गरे अनुसार सभापति लामिछानेले स्थानीयका समस्या, गुनासा र सुझावहरू प्रत्यक्ष सुन्ने कार्यक्रम छ। उहाँले पार्टीको आगामी दिशा र भावी योजनाबारे पनि प्रष्ट पार्नुहुनेछ।
यद्यपि, छोटो समयमा धेरै स्थानको भ्रमण र ‘घन्टी अभिवादन’ को भीडभाडमा कपिलवस्तुका ज्वलन्त स्थानीय समस्याहरू—जस्तै पूर्वाधार विकास, किसानका मर्का र व्यापारिक समस्याहरू—माथि गम्भीर विमर्श हुन पाउँछ वा पाउँदैन भन्ने प्रश्न उब्जिएको छ। भेटघाटको माहोल उल्लासमय देखिए पनि स्थानीय नागरिकहरू भने आफ्ना मुद्दाहरूले ‘घन्टी’ को आवाजभित्र कति स्थान पाउँछन् भन्ने पर्खाइमा छन्।
यो भ्रमण केवल शक्ति प्रदर्शन र अभिवादन साटासाटमा मात्र सीमित रहन्छ वा साँच्चै स्थानीय सरोकारका विषयमा केन्द्रित हुन्छ, त्यो भने भोलिको कार्यक्रमले नै प्रष्ट पार्नेछ।
